Alaska Better Cucukliryaraan Aturyaurtellerkaa

Cauga Ranked Choice Voting-aq?
Ranked Choice Voting-atgun cucuklirtet piyullermegteggun naaqutliciiqait tungliquureluki cucuklircitalriit.

Qaillun Ranked Choice Voting-aq calitua?
Cucukliryarani, cucuklirtet tungliquriciiqut naaqutetgun piyullermegteggun. Cucuklirtet citamaneng cucukestalrianeng egmirutellerneng cucukliqaaraarutmun cucukiciqut cucuklirrsuutnun elliarkaneng, wall’u-qa cucukliryukuneng write-in candidate-ameng, piiyuumaut ilakluku-llu cucukestalria tungliquurillermeggnun naaqutetgun. Avgem amllenraneng civuqliusqumallritgun cucukumakuni cucuklircitalria anagkengciquq. Cucukestalriartailkan avgem amllenraneng naaqeqaarraallratni, naaqiurallrat taqngaituq atauciq cucukestalria quyinrurnatkaanun. Waten piciquq:

Qaillun civuqliit cucuklillret naaqeciiqatki?
Keyiirraan cucuklilci civuqliusqumaluku naaqeciiqait.

• Cucukestalria civuqliurtellikuni amllenraneng avgem cucuklirrsuutni tauna cucukestalria anagkengciquq.
• Naaqerrallratni cucukestalriartailkan anagkengllermeng, naaqeciiqait tungliat.

Qaillun cucuklillret naaqetuitki tungliqliit kinguqliit-llu?
Nangneqliq cucukestalria civuqliit naaqerraarluki au͡gaumaciiquq cucuklirtem-llu tungliq cucukellra nugtarrluku ilaksagulluki cucukestalriit cucuklirrsuutmi. Una cucuklillret naaqenqigqurallrita piyaraa ayagturciquq, cucukestalria avgem amllenraneng cucukestengnatkaanun. Cucuklirta ataucimeng cucuklirarkangqerciquq naaqenqigtaqatki.

Atawaqalriaruuq-qaa tungliquurillrit amllerneng cucukarkaneng?
Ii-i, tungliquurillritgun cucukestalriit, piyukekngan cucukumayuumauq civuqliusqumakekngan anagkengenrilengraan. Cucukestalriit tungliqurillrita cucukellren atuuciquq 2nd, 3rd, 4th, wall’u-qa 5th-atnun cucukellerpet, cucukenqurraan au͡gaumangraan cikiumaluten cucukillerpet iliit anagnatkaanun.

Qaillun cucuklirrsuuteka citerciqsia Ranked Choice Voting-am cucukliryaraani?
Cucuklirtet tungliquureyuumait tamalkuita cucukestalriit (pivigkiurumaluku write-in candidate-arkaq) cucukliraqata aturluki imirarkat cucuklirrsuutmi cucuklilteng maniluki. Cucuklirtet tungliquuriyuumaut amllerneng wall’u-qa qayuturrneng cucuklircitalrianeng piyullermegteggun. Cucuklirtet tungliquuriyuumilkuneng ilaitneng cucuklircitalrianeng, uitacuumait imirpegnaki.

Cucuklirrsuutem iqsulirnerani alngaumaciqut cucuklircitalriit. Cucukestalriit-llu tallirpilirneratni naaqutet tungliquurarkat uitaluteng.

Ayuqucirtuun: Cucuklirki tungliquurluki cucukecetaalriit piyukekngaten.

• Tungliquuriyugngauten amllernek wall’ qavcinek cucuklircetaalrianek piyullerpeggun
• Kiingan imirluku atauciq kayangurngalnguq cucukecetaalriim column-aarani.
• Ciuqliusqumaakekngarpet atran column-aarani, imirru kayangurngalnguq 1-aaq
• Tunglia cucukekngarpet atran column-aarani imirru kayangurngalnguq 2-aalek.
• Pingayuqliat cucukekngarpet atran column-aarani imiirru kayangurngalnguq 3-aalek, tuatnaurluten
• Alartellikuvet cimirceskiu nutaramek cucuklircuutmek

Qaillun cucukliriyuumayia write-in candidate-ameng?
Cucuklirrsuutmi cucukekngan uitanrilkan, alngautniaran taum atra “write-in-am” citrani, imirluku-llu kayangurngalnguq tungliquutacirkaatun.

Cucuklitulimun cat alarcailkutnguat imillranun cucuklirrsuun cucuklirpagyarami?

WATEN PIVKENANG malruk tungliqurarkak ciplukek. Tawatnakuvet, keyirraan tungliqurillrit civuani kitullerpet naaqeciiqut.

Cucukecetaalriit ayuqluki tungliquuryaqunaki. Tungliquurkuvki ayuqluki, “over-vote”-auciquq “inactive ballot”-aarurrluni-llu naliqutciitnaqciqngan tunllerkaa kitumun cucukecetaalriamun.

Cucukestalria atauciq tunglilinqigtaryaqunaku. Cucukekngan tunglilinqigtaaquvgu, waten 1st, 2nd, 3rd, 4th, “tunglilinqigtaalriaruciquq” keyirraan-llu quyinqurraq tunglilillren cucukestalriamun naaqumaciquq. Tungliqurilleq cucukestalriameng ataucirqunrilngurmeng atawaqautngunrituq cucukestalriamun ayuqluni-llu imiqsailngurtun kinguqliit tungliquurararkat.

Ataucirrarmeng-qa cali cucukestalriameng cucukliryuumaunga?
Ii-i. Cucukliriyukuvet civuqliusqumakekngavneng keyiirran cucukliryuumauten. Tau͡gken, tungliquurikuvet allaneng cucukestalrianeng cakanircisngaunaku civuqliusqumakekngan.

Tungliquurikuma allaneng cucukestalrianeng, cimirciqaa-qa civuqliusqumakekngaqa?
Qang’a. Keyiirraan civuqliusqumakekngan naaqumaciquq naaqerrallratnun. Tawall’ 2nd, 3rd, 4th allat-llu cucukelten naaqeciiqait keyiirraan civuqliusqumakekngan cucukestalria anagkengenrilkan.

Cucuklirpagyarami-qa tamalkuita cucukestalriit tungliquurarkauganka?
Qan’ga. Piyullerpeggun tungliquuriyuumauten amllerneng wall’u-qa qayuturrneng cucukestalrianeng. Tungliquureyunrilkuvgu iliit cucukestalriit, uitatniaran imirvian column-aa. Ayuqelrianeng tungliquuriqeryaqunang qayutunun cucukestalrianun wall’u-qa tamalkuitneng tungliquurarkilluku atauciq cucukestalria.

Tungliquurikuuma citamaneng cucukestalrianeng, cucuklillruunga-qa citamarquneng?
Qang’a. Ataucirqumeng cucuklillren naaqumaciquq. Cucuklillren naaqumaciquq cucukenqurarpenun au͡gaumanrilngurmun. Cucukenqurraan au͡gaumallinikan, cucukenqurarpet kinguanun naaqumaciquq.

Cam naaqenqigtarciciqaki cucuklilriit?
Cucukestalriatailkan avgem amllenraneng anagkengllermeng naaqeraarcilluki cucuklirrsuutet naaqenqigciiqait.

Qaillun piciqat pitakekuuraqata naaqerrarcilluki? Naliit cucukestalriit egmiruciiqa?
Pitatekuuralriartangqerkan cucukestalriigneng ikgenqurneng cucukesciullregneng, Alaska-m alerquutiini qanrumauq anagtassiircitarkaulukek “by lot”- akun naliik cucukestalriik au͡gallerkagneng cali naliik egmirutarkaullranun kinguatnun naaqellerkait. “By lot”-aq kanginqertuq cucukliryaraliurtet atanrat flip a coin-arluni naliak-llu draw straw-rluni. Ayuqeciquq-llu taukuk nangenrak cucukestalriik pitatellgutkekagneng..

Qaillun ayuqeciiqa cucuklirpagyaram atakuani taqkata?
Naaqerrallrit cucuklirpagyaram atakuani qanrutekciqait keyiirraan cucuklirtet civuqliusqumakekngait. Civuani cucukliryarallermegcitun tamalkurmeng cucukestalriaruciqut State Review Board-am piciutassiirnatkaanun cucukliryaraq cali naaqumanatkatnun tamalkuita absentee cali questioned vote-at.

Qaku nani-llu naaqiciqat?
Naaqengellrit ayagnirciqut nangnermeng naaqerrarcilluki cucuklirrsuutet 15-at erenret kinguatni cucuklirrarcilluki. Juneau-mi atanrem caliviani naaqeciiqait.

Qaku unaksuumayia Ranked Choice Voting-at cucuklillrata naaqellritneng?
Piciutassiirumanrilnguut Ranked Choice-am cucukliryaraani nallunairumaciqut tamalkuita absentee-at questioned-aumalriit-llu cucuklirrsuutet naaqerraarcilluki, state-am alerquutiini qanrumauq 15-at erenret kinguatni Cucuklirraarcilluki. Naaqellrit piciulriarungaitut State Review Board-am piciutassiirnatkaanun cucukliryaraq.

Qaillun nallrunriciqsia qangvaq ciin-llu civuqliusqumakekngaqa au͡gaumallraneng?
Ilakluku nallunairillritni division-am website-aani, naaqellrit-ggun manimaciquq cucukestalria anagkenglleq, nallunairutet paivngaciiqut maniluki qayutuneng cucukliumallruciitneng cucukestalriit tamalkuita egmirutaqatki.

Cat calistait cucuklirnaqetuat Ranked Choice Voting-aq aturluku?
Alerqutngurcuumalriim ilakai atanerkaq/ataneruarkaq, U.S. Senator-aq, U.S. Representative-aq, Governor/Lieutenant Governor-aq, tamalkuita-llu state representative-at state senator-at-llu.

Ranked Choice Voting- arkun-qa cucuklirciqukut cuqcisteneng alerqutngurcuumalrianeng-llu?
Qang’a. Tamalkurmeng cuqcistengurtenqigculriit alerqutngurcuumalriit-llu cucuklirciqait piyaramegcitun angerluki wall’u-qa qang’arluki.

Qaku cucuklirciqat Ranked Choice Voting-aq aturluku?
November 8, 2022 Cucuklirpagyarami.

Ukut-qa nallunritarkat paivngaciqut allat qaneryaraitgun?
Ii-i. Nallunritarkat elicautekait-llu mumigcimaciqut paivngaluteng-llu division-am website-aani. Cucuklirtet nallunrirciciiqarput mumigcimarikata.

Kia-llu cali atutuagu Ranked Choice Voting-aq?
Akimiaq malrugneng cipluku U.S.-am nunarpautaini ilakluki San Francisco, Santa Fe, Minneapolis-aq-llu atutuut Ranked Choice Voting-ameng, Maine-am-llu atutuluku tamalkuitnun federal-at cucukliryaraitnun. Academy Awards-at-llu atutuit.

Assinqurraunrituq elitengnaqelqa naaqellritgun FAQ-at. Allaneng-qa elicarrsuutetangqerciquq?
Ii-i. Division-aq paivciciquq elicarssuutekaitneng cucukliqarrarpailgata cucuklirpagpailgata-llu upingallerkait cucuklirtet pitekluku mat’umun nutaramun cucukliryaramun. Man’a cucuklirtet elicarrsuutekait mumigcimalrianeng paivcistet-llu, ayagnillerkaa May 2021-am kiturarkauvkenaku, ilangqerciquq ukuneng: video-neng, live chat-aneng, elicarilrianeng, naaqerkaneng, graphic-aneng, cucukliruarrsutneng, tv/radio/internet-ani naaqerkaneng, mumigcimalrianeng ikayutekaneng, elicarrsutneng, unaksunarqelrianeng ikayuutekaitneng-llu cucuklitulit ikayurnarqelriit.