Skip to content
Back to Top

Alaska-m Assirikanirluni Cucukliryaraan Aturyaurtellerkaa

Nutaraq Cucukliryaraq

November 2020 Cucuklirpagyarami, cucuklirtet ciuniullruit Ballot Measure No. 2-aaq, aprumaluni “Alaska’s Better Elections Initiative.” Uum alerquutngurtellrem cimillruak State-am cucukliryaraa Nonpartisan Top Four (Cetaman cucukecetaalriit cucukumallret) cucukliqaraarutmun cucuklirpagyaraq-llu Ranked Choice Voting-aamun. (Cucuklirypagyarami-llu tungliquurluki naaqutliluki cucuklirluteng).

Cucuklircuutet Ayuqait

Yuvririyugngauten cucuklircuutet ayuqaitnek. Qanerkangqerkuvet wall’ apyutengqerkuvet, nallunricetniarpekut - elections@alaska.gov. Cucuklirtet ilagautesqumaaput cucuklircuutem ayuqucirkaanek.

Naaqutetgun Tungliquurluki Cucukliryaraq – Nalqigcimaluni

Tungliquurluki Naaqutliluki Cucukliryaram Apqaurutkuratukngait wall’u-qaa FAQ-rit

Cauga Ranked Choice Voting-aaq?
Ranked Choice Voting- aatgun cucuklirtet piyullermegteggun naaqutliciiqait tungliquurluki cucuklircetaalriit.

Qaillun Ranked Choice Voting-aaq calilarta?
Cucukliryarani, cucuklirtet tungliquurluki piciqait naaqutetgun piyullermegteggun. Cucuklirtet cetamanek cucukecetaalrianek ciumurutellernek cucukliqaaraarutmi cucukiciqut cucuklircuutnun elliarkanek wall’ cucukliryukuneng write-in candidate-aamek, piyugngaut ilakluku-llu cucukecetaalria tungliquurluki pillermegteggun naaqutetgun. Avgem amllenranek cucukumakuni cucuklircetaalria anagkengciquq. Cucukecetaalriartailkan avgem amllenranek naaqeqaarraallratni, naaqenqigtaarturciqut atauciq cucukecetaalria quyinrurnatkaanun. Waten piciquq:

Qaillun cucukellret ciuqliit naaqeciiqatki?
Kiingan ciuqliusqumaluku cucukellren naaqeciiqaat.

  • Cucukecetaalria ciuqliurtellikuni amllenranek avgem cucuklircuutni tauna cucukecetaalria anagkengciquq.
  • Naaqeqaarraallratni cucukecetaalriartailkan anagkengllermek, naaqun tunglianun naaqutnguciquq.

Qaillun cucukellrit Round 2-aami naaqumaat tungliani qinguqliitni-llu?
Nangneqliq cucukecetaalria ciuqliit naaqerraarluki au͡gaumaciiquq cucuklirtem-llu tungliq cucukellra nugtarrluku ciuqlirmun ilaksagulluki cucukecetaalriit cucuklircuutmi. Una cucuklillret naaqenqigqurallrita piyaraa ayagturciquq, cucukecetaalria avgem amllenranek cucukestengnatkaanun. Naaqenqigcimallratgun cucuklirta ataucimek cucuklirarkangqerciquq.

Atawauguq-qaa amllernek cucukarkanek tungqliquurillrit?
Aa-ang, tungliquurluku cucukecetaalrianek pikuvet, piyukekngan cucukumayugngauq ciuqliusqumakekngan anagkengenrilengraan. Cucukecetaalriit tungliqurillritggun cucukellren atuuciquq 2nd, 3rd, 4th, wall’ 5th-aaratnun cucukellerpet, ciuqliq cucukellren au͡gaumangraan cikiumaluten cucukillerpet iliit anagkengnatkaanun.

Qaillun cucuklircuuteka mingugciqsia ,Ranked Choice Voting-aam cucukliryaraani?
Cucuklirtet tungliquuryugngait tamalkuita cucukecetaalriit (pivigkiurumaluku write-in candidate-aarkaq) cucukliraqata aturluki imirarkat cucuklircuutmi cucuklilteng maniluki. Cucuklirtet tungliquuriyugngaut amllernek wall’ qavcinek cucuklircetaalrianek piyullermegteggun. Cucuklirtet tungliquurluki piiyuumiilkuneng ilaitnek cucuklircetaalrianek, uitacugngait imirpeknaki.

Cucuklircuutem carumilirnerani igausngaciqut cucuklircetaalriit. Cucukecetaalriit tallirpilirneratni tungliqluteng naaqutet uitaut.

Correct way to mark a ballot Ayuqucirtuun: Cucuklirki tungliquurluki cucukecetaalriit piyukekngaten.

  • Tungliquuriyugngauten amllernek wall’ qavcinek cucuklircetaalrianek piyullerpeggun.
  • Kiingan imirluku atauciq ag’ayanqellria cucukecetaalriim column-aarani.
  • Ciuqliusqumaakekngarpet atran column-aarani, imirru ag’ayanqellria 1-aaq.
  • Tunglia cucukekngarpet atran column-aarani imirru ag’ayanqellria 2-aalek, tuatnaurluten
  • Alartellikuvet cimirteskiu nutaramek cucuklircuutmek

Qaillun cucuklirciqsia write-in candidate-aamek?
Cucuklircuutmi cucukekngan uitanrilkan, igautniaran taum atra “write-in-aam” cetrani, imirluku-llu ag’ayanqellria tungliquutacirkaatun.

Cucuklitulimun cat alarcailkutnguat imillranun cucuklircuutem cucuklirpagyarami?

Qec’kariyaqunak cipluku malrugnek tungliquurararkagnek. Tuatnakuvet, kiingan tungliquurluteng pillret taum ciungani naaqumaciqut.
Kitullrit tungliquurarkat

Cucukecetaalriit ayuqluki tungliquuryaqunaki. Tungliquurkuvki ayuqluki, “over-vote”-auciquq “inactive ballot”-aarurrluni-llu naliqutciitnaqciqngan tunllerkaa kitumun cucukecetaalriamun.
Cucuklirpallaumalria

Cucukecetaalria tunglilinqigtaaryaqunaku. Cucukekngan tunglilinqigtaaquvgu, “tunglilinqigtaalriaruciquq” kiingan quyinruluku tungliquurluku pillren naaqumaciqluni. Tungliqurilleq cucukecetaalriamek ataucirquunrilngurmek atawaunrituq cucukecetaalriamun ayuqluni-llu imiqsailngurtun kinguqliit tungliquurararkat.
Duplicate Vote

Ataucirrarmek-qaa cali cucukecetaalriamek cucukliryugngaunga?
Aa-ang. Cucukliryukuvet ciuqliusqumakekngavnek kiingan cucukliryugngauten. Tau͡gken, tungliqluki allanek pikuvet cucukecetaalrianek cakanirngaituq ciuqliusqumakekngan.

Tungliqluki-qaa pikuma allanek cucukecetaalrianek, cimirciqaa-qaa ciuqliusqumakekngaqa?
Qang’a. Kiingan ciuqliusqumakekngan naaqumaciquq naaqiqarraallratnun. Tua-i-llu 2nd, 3rd, 4th allat-llu cucukelten naaqeciiqait kiingan ciuqliusqumakekngan cucukecetaalria anagkengenrilkan.

Cucuklirpagyarami-qa tamalkuita cucukecetaalriit tungliquurluki piarkauganka?
Qan’ga. Piyullerpetun tungliquurluki piyugngauten amllernek wall’ qavcinek cucukecetaalrianek. Tungliquurluki piiyuumiilkuvet iliit cucukecetaalriit, uitatniaran imirvian column-aara. Ayuqllerianek tungliqluki piqeryaqunak qavcinun cucukecetaalrianun wall’ tamalkuitnek tunglilirluku atauciq cucukecetaalria.

Tungliqluki pillrukuuma cetamanek cucukecetaalrianek, cucuklillruunga-qaa cetamarqunek?
Qang’a. Ataucirqumek cucuklillren naaqumaciquq. Cucukellren naaqumaciquq cucukenrullerpenun au͡gaumanrilngurmun. Cucukenrullen au͡gaumallikan, cucukenrullerpet tunglianun naaqumaciquq.

Cam naaqenqigtaarceciiqaki cucuklilriit?
Cucukecetaalriartailkan avgem amllenranek anagkengllermek naaqeraartelluki cucuklircuutet naaqenqigciiqait.

Qaillun piciqat pitakekuurqata naaqillratni? Naliat cucukecetaalria ciumuruciiqa?
Pitatekuuralriartangqerkan cucukecetaalriignek ikgellrulutek cucukumallregnek, Alaska-m alerquutiini qanrumauq anagtassiircetarkaulukek “by lot”-akun naliak cucukecetaalriik au͡gallerkaanek cali naliak ciutmurucimallerkaanun ekluni. “By lot”-aq kanginqertuq cucukliryaraliurtet atanrat flip a coin-arluni wall’u draw straw-rluni. Ayuqeciquq-llu taukuk nangenrak cucukecetaalriik pitatekekagnek.

Qaillun ayuqeciiqa cucuklirpagyaram atakuani taqkata?
Naaqeqarrallrit cucuklirpagyaram atakuani qanrutekciqait kiingan cucuklirtet ciuqliusqumakekngait. Ciungani cucukliryarallermegcetun tamarmeng naaqeqarraallrit piciurngaitut State Review Board-am piciutassiirnatkaanun cucukliryaraq cali-llu naaqumanatkaatnun tamalkuita absentee cali questioned vote-ait.

Qaku nani-llu naaqiciqat?
Naaqingellrit ayagnirciqut 15-aat erenret cucuklillrem kinguani. Juneau-mi atanrem caliviani naaqeciiqait.

Qaku unaksugngasia Ranked Choice Voting-aat cucuklillrata naaqellrit?
Piciutassiarumanrilnguut naaqeqarraallrit Ranked Choice-am cucukliryaraani nallunairumaciqut tamalkuita absentee-t questioned-aarumalriit-llu cucuklircuutet naaqerraartelluki, state-am alerquutiini qanrumauq 15-aat erenret Cucuklillrata kinguani. Naaqellrit piciulriarungaitut State Review Board-am piciutassiirnatkaanun cucukliryaraq.

Qaillun nallunriciiqsia qangvaq ciin-llu ciuqliusqumakekngaqa au͡gaumallranek?
Ilakluku nallunairillritni division-aam website-aani, naaqellrit-ggun manimaciquq cucukecetaalria anagkenglleq, nallunairutet paivngaciiqut maniluki qavcinek cucukliumallruciitnek cucukecetaalriit tamalkuita ciumurutaqatki.

Cat calistait cucuklirnaqetuat Ranked Choice Voting-aaq aturluku?
Alerquutngurtellrem ilakai atanerkaq/ataneruarkaq, U.S. Senator-aak, U.S. Representative-aaq, Governor/Lieutenant Governor-aaq, tamalkuita-llu state representative-aat state senator-aat-llu.

Ranked Choice Voting-aakun-qaa cucuklirciqukut cuqcistenek alerquutngurcugngalrianek-llu?
Qang’a. Tamarmeng cuqcistengurtenqigculriit alerquutngurcugngalriit-llu cucukeciqait piyaramegcetun angerluki wall’ qang’aarluki.

Qaku cucuklirciqat Ranked Choice Voting-aaq aturluku?
November 8, 2022 Cucuklirpagyarami.

Ukut-qaa nallunritarkat paivngaciqut allat qaneryaraitgun?
Aa-ang. Nallunritarkat elitnaurutait-llu mumigcimaciqut paivngaluteng-llu division-aam website-aani. Cucuklirtet nallunrirceciiqarput mumigcimarikata.

Kia-llu cali atulartau Ranked Choice Voting-aaq?
Akimiaq malrugnek cipluku U.S.-aam nunarpautaini ilakluki San Francisco, Santa Fe, Minneapolis-aaq-llu atulartut Ranked Choice Voting-aamek, Maine-am-llu atularai tamaitnun federal-aat cucukliryaraitnun. Academy Awards-aat-llu atularaat.

Elitengnaqelqa naaqellritgun FAQ-aat assinqurraunrituq. Allanek-qaa elitnaurcuutekangqerciquq?
Aa-ang. Division-aaq paivciciquq elicarcuutekaitnek cucukliqarrarpailgata cucuklirpagpailgata-llu upingallerkait cucuklirtet pitekluku mat’umun nutaramun cucukliryaramun. Man’a cucuklirtet elicarcuutekait ikayuutekaitnun cucuklircetaalriit ayagnillerkaa May 2021-aam kiturarkauvkenaku, ilangqerciquq ukunek: video-nek, live chat-anek, elicarilrianek, naaqerkanek, graphic-aanek, cucukliruarcuutnek, tv/radio/internet-ani naaqerkanek, mumigcimalrianek ikayutekanek, elicarcuutnek, unaksunarqellrianek-llu ikayuutekaitnek cucuklitulit ikayurnarqellriit.

Nonpartisan Top Four FAQ-rit (Citaman cucukecetaalriit cucukumallret) wall’u-qaa Apqaurutkuratukngait

Cauga Nonpartisan Top Four cucukliqaraaryaraq? (Political Party-tgun apertuumavkenateng Cetaman cucukecetaalriit cucukumallret)
Ataucirrauciquq cucuklircuun, allakarpeknaki political party-nun tamarmeng-llu cucukecetaalriit igausngaluteng. Ataucimek cucuklircetaalriamek cucuklirciqut, political party-t iliitnun ingluallrat nagutekevkenaku.
Cetaman cucuklircetaalriit amllenritgun cucukumallret cucuklirpagyarami igausngaarkauluteng. Cucukecetaalriit political party-nun ilausngaciit igausnganrirciqut cucukliqarraarutmi.

Cetaman nurrluku cucukecetaalriartangqerraqan qaillun piarkaugat?
Tamarmeng cucukecetaalriit egmiuciiqait cucuklirpagyaramun.

Qaku Nonpartisan Top Four cucukliryaraq aturyaurciiqatgu?
Cucukliqaarraaryarami August 16, 2022-aami.

Naliitnun-qaa political party-nun ilagausngallma qaillun cucukliryugngalqa cakaniutekciqaa?
Qang’a. Tamarmeng cucukecetaalriit igausngaciqut cucuklircuutmi cucuklitulit-llu cucukiyugngaluteng kemyukekmeggnek naliitnun political party-nun ilagausngang’ermeng.

Kina cucukliqaarraarutmi cucuklircetaaryugngaa?
Cucukliryugngalriim nall’arcimakuniki pinarqutai AS 15.25.030(a) cucukecetaalriaruyugluni-llu cucukliqaarraarutmi imiriyugngaut cucukecetaalriit kalikaitnek. Cucukliqaarraartumi cucukecetaalriit ilagaucimanrilngermeng political party-ni wall’u political group-ani cucukecetaaryugngaut.

Qaillun-mi piarkauga cucuklircetaararkaq kiturillrukuni imirillerkam taqlerkiuraanek?
Ilagautescigaciiquq cucukliqaarraarutmi tau͡gaam imiriyugngauq write-in candidate-aaruyugluni cucuklirpagyaram cucuklircuutiini.

Cucukecetaalria-qaa ilagausnganrilnguq political party-ni cucukecetaaryugngauq kaigan aturluku cucuklirpagyaraami?
Qang’a. Nutarami alerquutmi, cucukecetaalriit aturnanrirciqait kaigan cucukecetaaryukuneng cucuklirpagyaraami. Cucukecetaalriim atra cucukliqaarrarutmi igaucimallrunrilkan cucuklircuutmi wall’u ciutmurutellrunrilkan cucuklirpagyaramun, cucukecetaaryugnaut write-in candidate-aaruluteng, igallrukuneng cucukecetaalriaruyugluteng tallimani ernerni cucuklirpagpailgata.

Cucukliqaarraarutmi-qaa imiriyulriit cucukecetaalriaruyugluteng amllertacingqertut?
Qang’a

Cali-qaa allakaumaciiqut alerquutngurcugngalriit cucukliqaarraarutem cucuklircuutiini?
Qang’a. Allakaumangailata political party-tgun cucukliqaarraarutmi, alerquutngurcugngalriit allakaita cucuklircuutengqernaqngaitut.